Luk 8 | WSK | STEP | Udagi te Jesus wonong wonong Kaem ko kingdom ko den gilalong yawara balu balu geragakaso. Noko olekem 12 mu arungu tala.

Luke 8

Imet sang agotala Jesus kowom karoman

1 Udagi te Jesus wonong wonong Kaem ko kingdom ko den gilalong yawara balu balu geragakaso. Noko olekem 12 mu arungu tala. 2 Se imet saki, bur memek se kuera ikes nungumik ningi animan wore nunga kaoram se nungeman, mu karogo nu ilak geragakasan. Bo mu Maria, nu Magdala imet, ulengkala Jesus bur memek 7 kumik ningi aniram mu kaoram. 3 Bo Joanna, noko kuari ko nup Cuza, nu King Herod ko kawam ko ura kariimet nunga supuling. Bo Susanna. Se imet sang suen biya tala. Imet ari imitang mu nuna Jesus ko olekem arungu na inang se nongota nunga manga mel te nunga sangarukasan.

Kari na muguri ningam te waram ko den ira

(Mat 13:1-9; Mark 4:1-9)

4 Wonong wonong ko kariimet Jesus kote taikasan. Suen biya arataman ale biguwuman bagaman, asele Jesus den ira bo iwita balam:

5 “Kari bo ko ningam te na muguri warukko namaram. Ale aolak iluwam nama se na muguri mu warukaso. Muguri saki lage te kapaman. Se kariimet lage karoman nama se ereman. Se saki mu inanganang taiman naman. 6 Se muguri saki ali manga ago mu te kapaman, gurek papak maman, bare ali yu mena se aking marakaman. 7 Se muguri saki mayang kore ago wore ningi kapaman ale tarigiman. Bare mayang kore ago mu agotala tarigiram ale nunga iram. 8 Se muguri saki ali ningo mu te kapaman. Umutang mu yawarakala tarigiman, ale nunguning yawarakala kapaman. Muguri suwan suwan papak maman tarigiman ale nunguning beteman mu nunga nunguning suwan suwan ko muguri 100 100 iwita aratu aratu namaman.”

Buta balam mu Jesus airam balam, “Nina nedegewa ago agi mu, den imi ninguru ikialko!”

Jesus na muguri ko den ira wore ko duap balam

(Mat 13:10-23; Mark 4:10-20)

9 Jesus ko olekem den ira balam wore ko nunguning ko isarman. 10 Se nu nunga maonam, “Kaem nina nego ko ikiam ale ninga balam, nina ko kingdom ko duap aguwaya mu ko ikialko. Bare kariimet sang aninga den ira wore la ikisan. Umutang te nuna loaga lagomon bare mel bo me aringimonko, nuna den iki lagomon bare ko duap me ko ikimonko.

11 “Se den ira imi ko duap iwita: na muguri te balem mu Kaem ko den. 12 Na muguri lage te kapaman mu ko duap iwita: kariimet sang Kaem den ikisan, bare Satan taiso den nongomang ningi beteman mu kutuwu taso, nuna den umu ko nongomang ningi nunguning aruk se Kaem nunga giok bore ko, nu taiso kutuwu taso. 13 Se na muguri ali manga ago mu te kapaman mu ko duap iwita: kariimet sang den ikisan ale ago amilmilasan. Bare den mu ninguru me ilukuawusan. Nuna tom katirta ko nongomang ningi nunguning aso, se karogo baga se, nononga ira ariga bo taiso mu nuna te dagulasan, ale den taman mu sapasan. 14 Se na muguri mayang kore ago wore ningi kapaman mu ko duap iwita: kariimet sang nuna den ikisan, bare aolak ilu nama ali mel ko bagara, ko ikia, ko ikup, ko amilmil barasoso den nunguning taman mu kaluwuso menawuso. Butata se nononga nongomang ningi nunguning sokel ago me aratoso, am menaso. ^{▼▼Luke 8:14 Nangimik mel ago bagara: Luke 18:18, 22-24. Ali imi ko munan: 1 John 2:15-17.} 15 Bare na muguri ali ningo mu te kapaman mu ko duap iwita: kariimet sang den ikisan, nononga nongomang ningi yawarakala se den ninguru ilukuawusan ale karo tusan. Se den mu ikia ningo ko lage nunga kasurso se te namasan, umutang mu den mu ko nunguning mu iwitata kaposo.

Galep me kaluwunakko

(Mark 4:21-25)

16 “Kariimet galep kasasan ale taiwir te me ira betesan, aking barim atepe me betesan. Mena. Nuna wetang te ituwu betesan, se kariimet kawam umu te taisan mu nikitang nungarso. 17 Mu awuk, mel suen la yumura te aniso mu udagi te wetang te aratukko. Mel suen biya kariimet iramurman se aniso, mu ago wetang te sor nikim te aratomonko.

18 “Buta se ninguru sinar tal ale den ikialko. Mu awuk, kariimet Kaem ikia nungarso se ilukuawusan, mu Kaem ikia sang udagi agotala nungarukko. Bare kariimet Kaem ko ikia nungaram mu me ilukuawusan, mu ikia katirta nongote aniso mu mena sapurukko.”

Jesus ko nuam se ko uria mitak

(Mat 12:46-50; Mark 3:31-35)

19 Jesus ko nuam se ko uria mitak nu aringimonko kote taiman. Bare kariimet suen biya, se nuna kote pingi namomonko mu me terong. 20 Se kari sikina nu manorman, “Nika niam, ka uria mitak arungu ni karkomonko taiman ale matangi sanami se anisan.”

21 Bare nu den koma iwita nunga maonam, “Kariimet Kaem ko den ikisan ale karo tusan umutang aninga ayam alo, aninga uria mitak,” ma balam.

Jesus daula gagi nunga maonam se kutek maman

(Mat 8:23-27; Mark 4:35-41)

22 Tom bo te Jesus ko olekem nunga maonam, “Ana dal te araganak ale yu komasang te kasu kapanakko,” mam. Se eng dal te aragaman ale namakasan. 23 Ale namawa Jesus aniram kueram. Se daula biya tairam ale gagi magaram, se gagi dal ningi kapakaso se nuna sarengomonko katirta.

24 Se olekem suen la ninguru nguangaman, ale namaman Jesus mumurman ale manorman, “Kari Biya,” maman, “ana sarenganakko katirman!” maman. Asele nu barasam daula gagi barasuwaman mu den sail ago nunga maonam se kawus maman, se malin saparam. 25 Asele nu nunga maonam, “Nenenga nengemang ningi nunguning aparete beteman a?”

Bare nuna nguangakasan, ale nongota nunumi ago munakakasan ale balukasan, “Kari ewere awiri se nu gagi daula nunga manarso se kuring karo tusan a?” makasan.

Jesus kari ngualara bur memek ago wore nungam

(Mat 8:28-34; Mark 5:1-20)

26 Jesus ko olekem arungu dal te Yu Galilee batagorman ale nama Gerasa sor te arataman. Galilee sor mu Yu Galilee komasang te, se Gerasa sor mu komasang te. 27 Se nuna nama arataman ale Jesus dal beteram kapawaram se sor mu ko kari bo kote tairam, nu bur memek kumik ningi anikasan. Se nu ulengkala biya guang me katakaso, ale ko uningi kawam te me bagakaso, nu garap gogong kari kuera wore ningi nunga tugukasan mu ningi la bagakaso.

28 Bare nu Jesus arigam mu nu biyala niaram ale koma dugu te dagulam ale sail te balam, “Jesus, ni Kaem Kualala Biya ko Kuriang, ni awuk aga bitarko ya?” mam. “Ani nika isarsam ni ani yaman me aisuko!” mam. 29 Nu uwuta balam, mu awuk, Jesus bur memek kari mu bitirukko baluwaram ewerete se. Tom suen biya nuna suwik kuting mayang sen te ninguru talipakasan, bare bur memek nu ilukasan ngual tuikasan, se sen mayang am batutumu warukaso, ale nagukaso sor kariimet mena mu te namakaso.

30 Se Jesus nu isuam, “Nika nip awiri ya?”

Se nu balam, “Aninga aip Kager Motam Biya,” mam. Mu awuk, bur memek suen biya nu kumik ningi anikasan. 31 Se bur memek Jesus ilak wosengakasan, “Ni anananga karo se mutim du biya mu ningi me namanakko,” makasan. ^{▼▼Luke 8:31 Mutim du biya: Rev 20:3.}

32 Duruk gotek bo pingita mu te buruk motam biya na no gi se animan. Se bur memek sail te Jesus isarman, “Ni anananga awur se nama buruk mu nungumik ningi kapanakko,” maman. Se Jesus aing mam se, 33 bur memek kari mu beteman ale nama buruk nungumik ningi nagu gilingiman. Se buruk suen la sail karogo naguman nama gamung bo ita kulukua mu ko norogen la naguman nama yu ningi kapaman ale kueman.

34 Se buruk ko bitua kari mel mu aringiman ale naguman wonong bibiya se wonong gotektek te nama gilingiman ale den balman. 35 Se kariimet aringimonko taikasan. Tai Jesus kote arataman mu kari ulengkala bur memek ago bagaram mu aringiman. Bare nu aitak guang kataram, ale noko ikia nungeram se Jesus kumik duap te daigam ale bagakaso. Se aringiman ale nguangakasan. 36 Se kari mel nomotam te aringiman mu nuna kari ngualara aguwaya nungeram mu ko dugu duap kariimet nunga manorman. 37 Se Gerasa kariimet tawun biya nguangaman, ale Jesus manorman, “Ni anananga bitar ale namarko,” maman. Se Jesus dal te aragam namakaso.

38 Se namurukko negawaram se kari bur memek nu beteman mu nu auram ale maonam, “Ani nikerak namirikko,” mam.

Bare Jesus nu maonam, 39 “Ni am piler ka wonong te namar ale Kaem mel yawara ni kimik te beteram mu baluko,” mam. Se nu peleram namaram ale Jesus mel biya nu kumik te beteram mu balu balu geragam.

Jesus imet bo noko guang iluwam mu saongam, ale aking Jairus ko nanawus mumam se barasam

Mat 9:18-26; Mark 5:22-43

40 Jesus yu komasang te peleram tairam se kariimet nu tairukko noko kimi bitawaman, mu ilak amilmilakasan. 41 Ilak amilmilawaman se kari bo ko nup Jairus, nu synagogue ko kari supuling bo, wore tairam Jesus soleng duap ningi bugura kulukuam ale maonam, “Ni ani agarak aga kawam te tairko,” mam. 42 “Aninga kuriang imet wore kuerukko kaeso.” Kari mu ko kuriang imet suwanta, noko yar 12 iwita.

Se Jesus den mu ikiam ale ilak aolak iluwam namakaso, se kariimet motam biya nu talurman se nu kusumuri aolak iluwakaso. 43 Se imet bo kariimet ningi agotala bagaram, mu nu yar 12 ningi gue la sapa lagakaso, bare nungurmonko me terong. ^{▼▼Luke 8:43 Batoga saki girakala batagorman mu te den imi ago aniso: “Nu ko manga doctor nongote menawu saparam.”} 44 Se nu Jesus buring ko la tairam ale noko guang kinikan ilu tam mu te tairatela noko kumik gue kapawaram mu pila sanamaram, me kapakaso.

45 Se Jesus isuam, “Awiri kuting aninga angimik te beteram a?” mam. Se suen biya balukasan, “Mu ana mena,” makasan.

Se Peter balam, “Kari Biya,” mam, “ni anape ko suwuta isesam? Kariimet suen biya nika talurman bagasan!”

46 Bare Jesus balam, “Kariimet bo aninga ilu tam. Ani aimi ikisam aninga asokel sang aga beteram ale kariimet bo sangukko namaram.”

47 Se imet mu numi ikiam nu numi kaluwurokko me terong. Se nguanga nguanga tairam ale Jesus suwik duap ningi bugura kulukuam. Ale kariimet motam biya wore nomokete ko dugu duap balam, duap aguwaya se nu Jesus ko guang ilu tam ale tairatela nungeram wore ko dugu duap balam.

48 Se Jesus nu maonam, “Imet,” mam, “nika gemang ningi nunguning nika nungam se nungerem. Se ka gemang lila te namarko.”

49 Jesus munakawaram se Jairus ko ura kari bo tairam ale Jairus maonam, “Nika kuriang maingkala kueram,” mam. “Se ni Kari Biya ura kowar tui se yam me namurukko.”

50 Bare Jesus den mu ago ikiam ale Jairus maonam, “Ni me nguangerko,” mam. “Ni gemang ningi nunguning te bager se ka kuriang barasukko.”

51 Asele Jesus Jairus ko kawam te namaram. Ale kasu nagurokko se kariimet suen la nunga maonam, am watingi bagomonko balam. Ale ko olekem Peter, John, James, se kuriang mu ko nuamnuet butata nunga giam ale arungu kasu naguram. 52 Imet kari suen biya kuriang mu ko nia mo se anikasan. Bare Jesus nunga maonam, “Nina me niaralko,” mam. “Kuriang me kueram, nu am aniwoso.” 53 Se nuna ninguru nu gusirukasan. Mu awuk, nuna maingkala ikiman kuriang nunguningta kueram.

54 Bare Jesus kuriang mu kuting te iluwam ale auram balam, “Kuriang, ni baresko!” 55 Se kuriang mu ko marak peleram kote tairam se tairatela maragaram. Se Jesus nunga maonam, “Nina na tual se naukko,” mam. 56 Kuriang ko nuamnuet ninguru tengeman. Bare Jesus nuguring kaolam, mel aratam imi kariimet me nunga maonal se ikimonko balam.